Прадастаўленне паслуг стацыянарнай сувязі ў бліжэйшы перыяд будзе накіравана на захаванне існуючай абаненцкай базы і прадастаўленне дадатковых сэрвісаў. Сеткі РУП «Белтэлекам» развіваюцца на базе платформы IMS. На 1 красавiка 2023 года колькасць абанентаў платформы IMS склала больш за 3,76 мільёна.

IMS (англ. IP MultimediaSubsystem) - мультымедыйная падсістэма на базе IP-пратаколаў, якая з'яўляецца рашэннем для пераходу ад класічных тэлекамунікацыйных тэхналогій да IP-тэхналогій. 

IMS-платформа  дазваляе распрацоўваць і прадастаўляць абанентам паслугі, заснаваныя на розных камбінацыях голасу, тэксту, графікі і відэа.

Новыя падыходы ў пытаннях пабудовы сетак доступу патрабуюць змяненняў у тым, што датычыцца канцавога абсталявання, якое ўстанаўліваецца на баку абанента. Для забеспячэння больш высокага пранікнення паслуг шырокапалоснага доступу, у тым ліку паслуг VoIP, у абанентаў устанаўліваецца мадэм (хатні шлюз), абсталяваны разнастайнымі інтэрфейсамі (аналагавы тэлефонны порт, парты Ethernet, порт Wi-Fi і інш.) і забяспечвае прадастаўленне як галасавых паслуг (VoIP), так і тэлематычных паслуг (доступ у Інтэрнэт, IPTV і інш).

Зараз падключэнне абанентаў ажыццяўляецца з выкарыстаннем наступных тэхналогій:

• Вузлы аптычнай сеткі доступу на базе тэхналогіі GPON, якія будуюцца для прадастаўлення паслуг электрасувязі ўсім абанентам шматкватэрных дамоў, перш за ўсё ў гарадскіх населеных пунктах, а таксама ў кварталах дамоў новай індывідуальнай забудовы. На 1 красавiка 2024 года да сеткі GPON падключана 2,97 млн. абанентаў РУП «Белтэлекам».
• Вузлы шырокапалоснага доступу тыпу DSLAM, якія ўводзяцца для прадастаўлення паслуг сувязі па праектах будаўніцтва сетак з выкарыстаннем медных кабеляў з мэтай эфектыўнага выкарыстання інвестыцый РУП «Белтэлекам», укладзеных у пабудаваную абаненцкую сетку, перш за ўсё на сельскіх сетках электрасувязі. Абаненцкая ёмістасць вузлоў DSLAM выкарыстоўваецца для прадастаўлення поўнага спектру шырокапалосных паслуг.
• Універсальныя вузлы доступу, якія забяспечваюць магчымасць устаноўкі ў іх абаненцкіх камплектаў з рознымі інтэрфейсамі: аналагавыя (POTS), шырокапалосныя медныя ADSL, VDSL-, SHDSL-інтэрфейсы, шырокапалосныя GPON інтэрфейсы. Такое тэхнічнае рашэнне дазваляе на пераходны перыяд за кошт устаноўкі аднаго вузла доступу з адзінай кропкай падлучэння да сеткі перадачы даных задавальняць попыт абанентаў на паслугі сувязі, на дадатковыя мультымедыйныя паслугі і дадаткі, якія прадстаўляюцца платформай IMS, і інш.

Тэхналогія GPON

У 2011 годзе пачалося падключэнне па тэхналогіі GPON абанентаў РУП «Белтэлекам». На 1 красавiка 2024 года колькасць абанентаў, падключаных да сеткі GPON РУП «Белтэлекам», дасягнула ўзроўню 2,97 мільёна.

Пры падключэнні абанентаў аптычны кабель пракладваецца непасрэдна да месцаў устаноўкі канцавога абаненцкага абсталявання. Такая тэхналогія прымяняецца не толькі пры будаўніцтве новых сетак доступу, але і пры мадэрнізацыі існуючых, напрыклад, пры вызваленні манціраванай ёмістасці АТС электроннага тыпу на гарадскіх сетках электрасувязі. Асноўнай мэтай абнаўлення ўжо існуючых сетак доступу з'яўляецца, перш за ўсё, неабходнасць паляпшэння якасці і пераліку прадастаўляемых паслуг за кошт пераключэння існуючых абанентаў шырокапалоснага доступу (xDSL) на новую тэхналогію (xPON).

Выкарыстанне тэхналогіі PON для будаўніцтва абаненцкага доступу дазваляе:

• забяспечыць абанентам шырокую паласу прапускання;
• пашырыць шырокавяшчальныя магчымасці;
• павялічыць даўжыню абаненцкай лініі аж да 20 км, аптымізаваць размеркавальную сетку і мінімізаваць яе энергаспажыванне (за кошт выкарыстання пасіўных аптычных разгалінавальнікаў);
• пашыраць дадатковыя сэрвісы і павялічваць хуткасці абмену трафікам перадачы даных у залежнасці ад патрэб абанентаў;
• уніфікаваць працэс падключэння і абслугоўвання абанентаў за кошт мінімальнага выкарыстання актыўнага абсталявання.