Напярэдадні дзяржаўнага свята – Дня Канстытуцыі – калектыў РУП «Белтэлекам» наведаў Палату прадстаўнікоў Нацыянальнага сходу Рэспублікі Беларусь. Візіт стаў унікальнай магчымасцю пазнаёміцца з работай галоўнага заканадаўчага органа краіны і дакрануцца да гісторыі беларускага парламентарызму.

Экскурсію для сувязістаў правёў намеснік Старшыні Палаты прадстаўнікоў Вадзім Іпатаў. Сустрэча пачалася з жывога дыялогу: удзельнікі цікавіліся працоўнымі правамі жанчын, пытаннямі пенсіённага забеспячэння, статусам ветэранаў працы.

Супрацоўнікі «Белтэлекама» пабывалі ў легендарнай Авальнай зале – месцы, дзе праходзяць пасяджэнні і прымаюцца найважнейшыя дзяржаўныя рашэнні. Экскурсантам падрабязна расказалі аб заканатворчым працэсе, у прыватнасці, аб тым, як праходзіць работа над праектамі законаў. Асаблівы акцэнт быў зроблены на тым, што голас кожнага грамадзяніна абавязкова будзе пачуты.

У час экскурсіі гасцей пазнаёмілі з гісторыяй станаўлення Палаты прадстаўнікоў, развіццём парламентарызму ў Беларусі, а таксама прынцыпамі работы заканадаўчага органа.

Знаёмства з гісторыяй працягнулася ў музеі парламентарызму, дзе ключавыя падзеі ажываюць у дакументах, фатаграфіях і ўнікальных экспанатах.

Экскурсія выйшла не толькі пазнавальнай, але і натхняльнай, дазволіўшы кожнаму ўдзельніку адчуць дачыненне да лёсу сваёй краіны.

Дзякуем за цікавую і змястоўную сустрэчу!