Сёння Драгічын адзначае Дзень горада. Брэсцкі філіял не застаўся ўбаку і падрыхтаваў для гасцей інтэрактыўную праграму, якая аб'яднала гісторыю сувязі і сучасныя тэхналогіі.

Цэнтрам прыцягнення на святочнай пляцоўцы стала выстава рэтра-тэлефонаў. Госці ўсіх узростаў з цікавасцю разглядалі апараты розных гадоў: ад легендарных дыскавых мадэляў да першых кнопачных прылад. Для многіх гэта было сапраўднае падарожжа ў мінулае, якое выклікала цёплыя ўспаміны. Побач з гістарычнай экспазіцыяй былі прадстаўлены актуальныя ўзоры тэхнікі, дзе ўсе жадаючыя маглі не толькі пазнаёміцца з навінкамі, але і набыць спадабаныя прылады.

Асаблівым творчым падарункам для драгічынцаў стала выступленне народнага хору «Вербніца». Іх пранікнёнае выкананне любімых песень напоўніла плошчу асаблівай атмасферай утульнасці і яднання, а гледачы шчодра ўзнагароджвалі артыстаў апладысментамі.

Яркая лакацыя Брэсцкага філіяла стала адным з самых наведвальных месцаў свята, арганічна дапоўніўшы багатую праграму Дня горада Драгічына.