Зусім хутка ў Беларусі адзначаць Дзень аўтамабіліста і дарожніка, які традыцыйна прыпадае на апошнюю нядзелю кастрычніка. Напярэдадні свята Міністэрства транспарту і камунікацый Рэспублікі Беларусь назвала найлепшых вадзіцеляў краіны. У іх ліку ‒ прадстаўнікі РУП «Белтэлекам».
Загадам Міністра транспарту і камунікацый нагрудным знакам «За працу без аварый» узнагароджаны 28 вадзіцеляў нашага прадпрыемства. Гэтая высокая ўзнагарода ўручаецца тым, хто на працягу многіх гадоў кіруе аўтамабілем без адзінага ДТЗ і парушэнняў Правіл дарожнага руху. За кожным такім вынікам стаяць жалезная дысцыпліна, каласальны вопыт і сапраўднае майстэрства. Нядзіўна, што гэты знак лічаць галоўным сведчаннем высокай культуры ваджэння ‒ і нашы калегі даказалі гэта на практыцы.
Асаблівая нагода для гордасці: дзесяць вадзіцеляў прадпрыемства ўдастоены знака I ступені. Іх безаварыйны стаж складае не менш за 8 гадоў. Яшчэ 18 чалавек адзначаны знакам II ступені, які пацвярджае як мінімум 5 гадоў бездакорнай працы за рулём.
Узнагароды да прафесійнага свята ўжо даўно сталі добрай традыцыяй для нашай кампаніі. За апошнія 10 гадоў нагрудным знакам «За працу без аварый» адзначаны 313 вадзіцеляў «Белтэлекам», 126 з іх атрымалі ўзнагароду першай ступені.
Шчыра віншуем калег з заслужаным прызнаннем! Самыя цёплыя словы адрасуем усім, для каго Дзень аўтамабіліста і дарожніка з’яўляецца прафесійным святам. Жадаем моцнага здароўя, бадзёрасці духу і паспяховай рэалізацыі ўсіх планаў. Няхай дарогі заўсёды будуць бяспечнымі, а на жыццёвым і прафесійным шляху гарыць толькі зялёнае святло!
